மணவாளக்குறிச்சி போலீஸ்நிலையத்தில் திருமணம் நிச்சயிக்கப்பட்ட பெண் என்ஜினீயர், காதலனுடன் தஞ்சம்

மணவாளக்குறிச்சி போலீஸ்நிலையத்தில் திருமணம் நிச்சயிக்கப்பட்ட பெண் என்ஜினீயர், காதலனுடன் தஞ்சம்

16-02-2015

மணவாளக்குறிச்சி பிள்ளையார் கோவில் பகுதியை சேர்ந்தவர் ராஜகோபால். அம்மாண்டிவிளை பகுதியில் உள்ள ஒரு கலை கல்லூரியில் காவலராக வேலை செய்து வருகிறார். அவரது மனைவி தங்கம். இவர்களது மகள் வித்யாகிருஷ்ணன் (வயது 21). அவர் பி.இ. படித்து முடித்துள்ளார். தற்போது நாகர்கோவிலில் உள்ள தனியார் நிறுவனம் ஒன்றில் வேலை பார்த்து வந்தார். வித்யாகிருஷ்ணனுக்கு பெற்றோர்கள் திருமணம் செய்து வைக்க முடிவு செய்தனர். இதனைத்தொடர்ந்து மார்த்தாண்டம் பகுதியை சேர்ந்த ஒரு வாலிபருடன் திருமண நிச்சயதார்த்தம் நடந்தது.

வருகிற ஏப்ரல் மாதம் 7- ம் தேதி திருமணம் என முடிவு செய்யப்பட்டது. வித்யாகிருஷ்ணனின் பெற்றோர்கள் திருமணத்திற்கான ஏற்பாடுகள் செய்து வந்தனர். திருமண அழைப்பிதழும் அச்சடிக்கப்பட்டது. இந்நிலையில் வித்யாகிருஷ்ணன் கடந்த 13- ம் தேதி திடீரென மாயமானார். உடனே பதறிப்போன பெற்றோர்கள் பல இடங்களில் தேடிப்பார்த்தும் அவர் கிடைக்கவில்லை. உடனே இது குறித்து ராஜகோபால் மணவாளக்குறிச்சி போலீசில் புகார் கொடுத்தார்.

அதன் பேரில் போலீசார் விசாரணை நடத்தி வந்தனர். இந்நிலையில், வித்யாகிருஷ்ணன், லட்சுமிபுரம் செட்டியார்மடம் பகுதியை சேர்ந்த தனது காதலனான சிபு (25) என்பவருடன், மணவாளக்குறிச்சி போலீஸ் நிலையத்தில் தஞ்சமடைந்தார். அவர்கள் தாங்கள் இருவரும் காதலிப்பதாகவும், தங்களை சேர்த்து வைக்குமாறும் போலீசாரிடம் தெரிவித்தனர். சிபு கார் டிரைவராக வேலை செய்து வருகிறார்.

உடனே இது குறித்து இரு வீட்டாருக்கும் போலீசார் தகவல் தெரிவித்தனர். வித்யாகிருஷ்ணனின் பெற்றோர்கள் தங்களுடன் வருமாறு வித்யாகிருஷ்ணனை அழைத்தனர். ஆனால் அவர் காதலனுடன் செல்வதில் உறுதியாக இருந்தார். சிபுவின் பெற்றோர் வித்யாகிருஷ்ணனை மருமகளாக ஏற்றுக்கொண்டனர். இதனைத்தொடர்ந்து போலீசார் வித்யாகிருஷ்ணனை காதலன் சிபுவை திருமணம் செய்து கொள்ளுமாறு அறிவுரை கூறி அனுப்பி வைத்தனர்.