குளச்சல் சுற்றுவட்டார பகுதிகளில் கருப்பு ஸ்டிக்கர்

குமரி மாவட்டத்தில் கடந்த சில நாட்களாக வீடுகளில் மர்மமான முறையில் கருப்பு ஸ்டிக்கர்கள் ஒட்டப்பட்டுள்ளன. இந்நிலையில் குளச்சல் புல்லன்விளையை சேர்ந்த தொழிலாளி ஆரீப் குடும்பத்துடன் வெளியூர் சென்றிருந்தார். இவர் திரும்பி வந்த போது வீட்டின் பின்பக்க ஜன்னல் கண்ணாடியில் கருப்பு ஸ்டிக்கர் ஒட்டப்பட்டிருந்ததை கண்டார்.

இதுகுறித்து தகவல் அறிந்த குளச்சல் போலீசார் சம்பவ இடம் வந்து விசாரணை நடத்தினர். இந்நிலையில் குளச்சல் அஞ்சாலி பகுதியைச் சேர்ந்த வர்க்கீஸ்(47) என்பவர் மனைவி நேற்று வீட்டு பின்புற சமையலறை ஜன்னலை சுத்தம் செய்தார். அப்போது கருப்பு ஸ்டிக்கர் இருந்ததை பார்த்தார். அவர், கருப்பு ஸ்டிக்கர் தொடர்பான செய்தியை படித்திருந்ததால், பீதியடைந்தனர். இதுகுறித்து வர்க்கீஸ் கொடுத்த புகாரின் பேரில் குளச்சல் போலீசார் விசாரணை நடத்தி வருகின்றனர்.