குளச்சல் அருகே வீட்டின் கதவை உடைத்து வெள்ளி பொருட்கள் திருட்டு: மர்ம ஆசாமிகளை போலீஸ் தேடுகிறது

குளச்சல் அருகே வீட்டின் கதவை உடைத்து வெள்ளி பொருட்கள் திருட்டு: மர்ம ஆசாமிகளை போலீஸ் தேடுகிறது

22-07-2015

குளச்சல் அருகே உள்ள கீழ்க்கரை கணியன்விளையை சேர்ந்தவர் மணி (வயது 33). இவர் வெளிநாட்டில் வேலை செய்து வருகிறார். இவருடைய மனைவி அனுஷா (24). இவருக்கு கடந்த 2 மாதங்களுக்கு முன்பு குழந்தை பிறந்தது.

இதனால் அனுஷா இரவு நேரங்களில் வீட்டில் தூங்காமல் அதே பகுதியில் உள்ள தனது தாயார் வீட்டிற்கு சென்று தூங்குவார். காலையில் வீட்டிற்கு வருவார். நேற்று முன்தினம் இரவும் இது போல தனது தாயார் வீட்டிற்கு தூங்க சென்றார். நேற்று காலை அனுஷா வீட்டிற்கு வந்த போது, முன்பக்க கதவு உடைக்கப்பட்டு கிடப்பதை கண்டு அதிர்ச்சியடைந்தார்.

உடனே வீட்டிற்குள் சென்று பார்த்தார். அப்போது வீட்டின் மேல் மாடி கதவுகளும் உடைக்கப்பட்டு திறந்து கிடந்தன. பிறகு அறைக்குள் சென்றார். அங்கிருந்த பீரோவும் உடைக்கப்பட்டு உள்ளே இருந்த பொருட்களும் சிதறி கிடந்தன. பீரோவில் இருந்த ரொக்க பணம் ரூ.5 ஆயிரம் மற்றும் வெள்ளி குத்து விளக்கு உள்பட வெள்ளி பொருட்களும் திருடுபோய் இருப்பது தெரியவந்தது.

அனுஷா இரவு நேரங்களில் தாயார் வீட்டிற்கு தூங்க செல்வதை நோட்டமிட்டு மர்ம ஆசாமிகள் கைவரிசை காட்டி உள்ளனர். இந்த சம்பவம் குறித்து குளச்சல் போலீசாருக்கு தகவல் தெரிவிக்கப்பட்டது. அதன் பேரில் போலீஸ் சப்–இன்ஸ்பெக்டர்கள் சாலமோன் ராஜன், ரசலையன் ஆகியோர் சம்பவ இடத்திற்கு விரைந்து வந்து விசாரணை நடத்தினர்.

மேலும் கைரேகை நிபுணர்களும் வரவழைக்கப்பட்டு அங்கு பதிவாகியிருந்த மர்ம நபர்களின் கைரேகைகளை பதிவு செய்தனர். இது குறித்து அனுஷா கொடுத்த புகாரின் பேரில், போலீசார் கொள்ளையடித்து சென்ற மர்ம நபர்களை தேடி வருகிறார்கள்.