கடியப்பட்டணம் பகுதியை சேர்ந்த மினி டெம்போ மோதி கார்–மோட்டார் சைக்கிள் விபத்து

கடியப்பட்டணம் பகுதியை சேர்ந்த மினி டெம்போ மோதி கார்–மோட்டார் சைக்கிள் விபத்து

15-09-2014

மணவாளக்குறிச்சி அருகே உள்ள கடியப்பட்டிணத்தை சேர்ந்தவர் வர்கீஸ் (வயது 50). இவர் இன்று காலை ஒரு மினி டெம்போவில் கடியப்பட்டிணத்தில் இருந்து கன்னியாகுமரி நோக்கி சென்று கொண்டிருந்தார். காலை 11 மணி அளவில் இந்த மினி டெம்போ கீழகிருஷ்ணன்புதூர் பகுதியில் சென்ற போது, திடீர் என்று டிரைவரின் கட்டுப்பாட்டை இழந்து சாலையில் தாறுமாறாக ஓடத் தொடங்கியது.

இதனால் அந்த மினி டெம்போ சாலை ஓரத்தில் இருந்த ஒரு கட்சி கொடி கம்பத்தை இடித்து தள்ளியது. அதன்பிறகு சாலையில் சென்று கொண்டிருந்த 2 மோட்டார் சைக்கிள்களை மோதி தள்ளியது. இதில் ஒரு மோட்டார் சைக்கிளில் பயணம் செய்த கேபிள் டி.வி. ஆப்பரேட்டர் சுதர்சன் என்பவர் காயம் அடைந்தார். இன்னொரு மோட்டார் சைக்கிளில் சென்றவர் கீழே குதித்ததால் காயம் இன்றி தப்பினார். அதன்பிறகு அந்த மினி டெம்போ ஒரு கார் மீது மோதி நின்றது.

இதை பார்த்ததும் சாலையில் சென்று கொண்டிருந்த பொதுமக்கள் அங்கு திரண்டனர். அவர்கள் அந்த மினி டெம்போவை மடக்கி பிடித்தனர். இதனால் அந்த பகுதியில் பரபரப்பு ஏற்பட்டது. அந்த தகவல் கிடைத்ததும் ஈத்தாமொழி போலீசார் அங்கு சென்று விசாரணை நடத்தினார்கள். மினி டெம்போ டிரைவர் வர்கீசை போலீஸ் நிலையத்திற்கு அழைத்து சென்றனர்.